xoves 21.11.2019
As actividades formativas comezarán no vindeiro mes de novembro

Aberto o prazo para o Obradoiro do Cigarrón

Ó longo do obradoiro, poderase aprender a facer o traxe completo de Cigarrón. Os luns dedicaranse á realización da máscara e os martes á confección do traxe.

Últimos retoques da máscara de Cigarrón no obradoiro organizado polo Concello de Verín.
Últimos retoques da máscara de Cigarrón no obradoiro organizado polo Concello de Verín.

Como cada ano dende 1997, o Concello de Verín organiza o Obradoiro do Cigarrón. Acábase de abrir o prazo de inscrición para participar nista actividade que ten como obxectivo prioritario transmitirlle ós participantes o respecto polas formas tradicionais do traxe típico do Entroido verinés. As clases comezarán no vindeiro mes de novembro, polo que o prazo de inscrición no obradoiro rematará o 30 de outubro.

Con esta iniciativa, o Concello de Verín pretende que a máscara máis antiga e con máis significado patrimonial do Entroido se manteña dentro duns canons tradicionais. É por elo que, no Obradoiro ensinarase a facer todos os elementos do Cigarrón, a excepción do pintado da careta e dos compoñentes de produción industrial.

Co fin de manter a tradición e maila consonancia no vestir, no obradoiro farase fincapé en todos os elementos á hora de vestir o traxe; transmitíndolles ós participantes o calzado máis axeitado e que harmoniza co traxe, o tipo de chocallos e cantos se deben levar ou como vestir a máscara e utilizala en público.

2019 Obradoiro Cigrrón c

O obradoiro divídise en dúas actividades formativas: aprender a facer a máscara e aprender a facer o traxe. Dende novembro, as tardes dos luns e dos martes quedarán reservadas na Casa da Xuventude para o Obradoiro do Cigarrón. Os luns, en horario de 16h a 19:30h será a quenda para aquelas persoas que somentes queran facer a careta do Cigarrón; os martes, no mesmo horario, para aquelas que queran confeccionar só o traxe. No suposto de haber demanda para crear dous grupos, o segundo grupo tería as actividades de traxe os mércores e as de careta os xoves.

Será necesario que cada participante leve os materiais e instrumentos necesarios para a realización do traxe de Cigarrón. Ademais, para a confección do traxe é necesario ter coñecementos de calceta, ganchillo e utilización da máquina de coser.

Aberto o prazo para o Obradoiro do Cigarrón
comentarios