Como todo o relativo ó Entroido, en Verín xa botamos en falta o bautismo dos novos Cigarróns que se viña facendo tradicionalmente. Logo de tres longos anos, neste #Entroido2023 volverá celebrarse o Bautizo do Cigarrón na Praza da Mercé. Será o sábado, día 18 de febreiro, a partir das 16:30 horas, cando 8 rapaces e rapazas vistan por primeira vez o traxe de Cigarrón nun evento que contará coa participación dos recoñecidos Esther Estévez e Rubén Riós que non quixeron deixar de colaborar no acto.
O prazo de inscrición no Bautizo do Cigarrón permanece aberto dende o pasado 14 de xaneiro. Como cada ano, serán 8 as nenas e nenos que poderán participar; para elo haberá que facer unha solicitude a través do mail [email protected], indicando os datos da persoa bautizada: nome completo, data de nacemento, domicilio, documento de identidade (se o ten), nome da persoa que o axudará a vestirse e un número de teléfono de contacto. A día de hoxe, xa hai catro rapaces inscritos.
Todos os participantes deberán subir ó escenario semi vestidos; é dicir, coa camisa, as medias e os zapatos e acompañados da persoa que os axudará a terminar de vestir o traxe de Cigarrón. Logo, irán vestindo o pantalón, a faixa, as ligas, a chaqueta, a gravata e, finalmente, as chocas. Ademais, recibirán un diploma e un agasallo como lembranza dise día tan esperado.
Sorteo de caretas de Cigarrón
A Asociación Cigarrón de Verín ofrecerá, a todos os asistentes ó acto na Praza da Mercé, a degustación gratuíta de bica e licor-café e terá un espazo, ubicado na mesma praza, para a venda de camisetas, sudadeiras e artículos da propia asociación. Ademais, ó longo do evento, procederase ó sorteo de dúas caretas de Cigarrón. As rifas para participar no sorteo están dispoñibles nos establecementos colaboradores que podes consultar na imaxe inferior.
As rifas para o sorteo das caretas xa están á venda ó prezo de 1€ en ditos locais comerciais e de hostalería. Iste ano, a Asociación Cigarrón de Verín premiará a dúas persoas afortunadas que obterán unha careta tradicional de Cigarrón.
