A tempada de outono ten dous protagonistas gastronómicos moi valorados e versátiles na cociña: as castañas e os cogomelos. A pesar de ser o maior produtor de castaña de Portugal, roldando as 15 mil toneladas ao ano, a localidade de Vinhais incorpora, nesta edición da Festa da Castaña, a número 16, unha xornada adicada a setas e fungos para todos os fanáticos destes alimentos.
A iniciativa, organizada polo Parque Biolóxico do municipio, terá lugar o sábado 6 ás 09:30h, cunha andaina didáctica na que o principal obxectivo será a recollida de exemplares. Como non podería ser doutro xeito, ao remate celebrarase un almorzo con ese suculento manxar seguido dunha conferencia na que se identificarán, diferenciarán e clasificarán cada unha das variedades.
Tras isto, a española Marisa Castro ofrecerá un taller sobre coidados e tratamentos tras unha posible intoxicación con cogomelos. Para isto, é esencial o paso anterior, saber identificalos e diferenciar que variedade é comestible e cal non. Ao remate, o chef portugués Francisco Xavier deleitará aos asistentes cunha degustación de diferentes pratos elaborados con este produto.
Para acudir a esta actividade, enmarcada na Rural Castanea, é necesario estar anotado previamente. Todos os interesados poderán inscribirse ata mañá, día 4 de novembro, por un prezo de 7,50€, no teléfono 933 260 304 ou no correo electrónico [email protected].
