Preto de 150 escolares da comarca de Verín-Monterrei e dos municipios da Gudiña e da Mezquita van participar na primeira "Xornada escolar de loita contra o lume", organizada pola Consellería do Medio Rural mailo Diario do Támega, coa colaboración do Concello de Verín e das empresas Cabreiroá e Hortoverín. Unha xornada que non se podería realizar sen a implicación do persoal do Distrito Forestal XIV Verín-Viana.
O obxectivo desta primeira xornada educativa é prender conciencia na cativada sobre a loita contra o lume; dedicadas especialmente a escolares de 4º, 5º e 6º de primaria porque son a cidadanía do futuro e cobra vital importancia formar dende a infancia na prevención de incendios e nos riscos e consecuencias que supoñen non só para o medioambiente, tamén para a economía. Así, participará o alumnado dos colexios públicos dos dez municipios.
A xornada desenvolverase ao longo da mañá do venres, 6 de xuño. Primeiro asisitrán a unha charla formativa para que teñan coñecemento sobre os incendios forestais e, despois, visitarán a base de medios aéreos transfronteiriza Oímbra-Verín. No marco do proxecto Interlumes, é a primeira base operativa construída para mellorar e intensificar a capacidade operativa de resposta na extinción de incendios forestais entre Galicia e Portugal.
Unha xornada práctica e lúdica
Nun territorio como o noso de alto risco incendiario, é fundamental que a cativada coñeza o dispositivo de prevención e de loita contra incendios forestais; este será o eixo central da charla á que asistirán no Auditorio de Verín. Será impartida por axentes medioambientais e técnicos do Distrito forestal XIV Verín-Viana e na que tamén participarán o director xeral de Defensa do Monte da Consellería do Medio Rural, Manuel Rodríguez, e o xefe do Dispositivo de Investigación de Incendios da Guardia Civil de Verín, Roberto Quintairos. Ademais, aprenderán que é un incendio e como actuar: a quen e onde chamar se ven un, como comportarse ante un incendio, etc.
Logo poderán visitar a base aérea Oímbra-Verín. Alí farán un completo percorrido polas instalacións e participarán en talleres formativos para coñecer o funcionamento dos medios de extinción aérea; poderán subir á torre de control, ver de primeira man os avións e helicópteros ou coñecer os equipos de extinción de incendios: motobombas, brigadas, axentes e mesmo falarán con bombeiros forestais de Portugal. Ao longo de toda a xornada, Cabreiroá achegará augas para a cativada e a empresa local Hortoverín encargarase dun aperitivo saudable con froita.
