A Feira do Lázaro celebrarase na vila do Támega durante a fin de semana do 16 e 17 de marzo; coma vén sendo habitual, no Pavillón de Deportes. Dende o pasado 6 de febreiro, o Concello ten aberto o prazo para que se podan anotar aquelas persoas que queren ter un stand nas feiras de alimentación e artesanía.
Se ben o prazo para a inscrición non finalizará ata a próxima semana, o 23 de febreiro, a área de Feiras do Concello de Verín vén de facer un chamamento a todos os expositores de artesanía e alimentación para que participen activamente na organización e desenvolvemento da Feira do Lázaro.
Búscase dende o Concello estimular a Feira do Lázaro e incrementar a asistencia de público. Por iso, convida aos expositores a propor ideas para o espazo de actividades da feira. Trátase de escoitar e de traballar en comunidade para ofertar unha proposta de actividades atractivas para o público.
O convite materializarase o martes, 20 de febreiro, na Sala de Xuntas do Concello de Verín. Ás 20:00 horas abrirá as súas portas para acoller unha reunión na que, dende a área de Feiras do goberno municipal, se agarda unha ampla participación.