O subdelgado do Goberno, Emilio González Afonso, reuniuse hoxe en Ourense con representantes de Unións Agrarias, a Asociación de Produtores de Pataca da Limia, o Sindicato Labrego Galego, FRUGA e ADEGAL. A reunión, para tratar as medidas que debe tomar o Goberno diante da situación do sector, produciuse mes e medio despois da protesta en Xinzo o 25 de marzo pasado, cunha tractorada con máis de 300 tractores polas rúas da capital da comarca.
Da reunión informou hai uns minutos o sindicato Unións Agrarias por medio dun comunicado no que dá conta que na reunión falouse “da crise de rendibilidade que afecta ao sector produtor e solicitar medidas de apoio que permitan facer fronte á suba de custos de produción sen precedentes”.
“Un produtor de pataca da comarca da Limia está a gastar hoxe unha media de mil euros diarios en gasóleo. Unha contía inasumible para as rendas de agricultores e gandeiros, que non están a beneficiarse da bonificación aos combustibles aprobada polo goberno central", indica a nota de prensa. Esa foi unha das queixas presentadas diante do subdelegado do Goberno en Ourense, a quen os produtores lle trasladaron "unha batería de propostas destinadas a aliviar a grave situación”.
Unións Agrarias, continúa o comunicado, aposta por un gasóleo libre de impostos para as explotacións e pola aplicación de bonificacións á enerxía para explotacións agrogandeiras e comunidades de regantes.
