Os servizos de extinción de incendios actuaron rapidamente para conter o avance dun incendio forestal que se declarou esta tarde nunha zona arborada moi próxima ao núcleo de Vilardevós.
Segundo informou Medio Rural, a superficie afectada foi unha hectárea, a alerta produciuse ás 16:48 horas deste mércores. Até o lugar do incendio desprazáronse catro brigadas e dúas motobombas, baixo a coordinación de dous axentes forestais. Tamén foi precisa a intervención dun helicóptero.
Segundo testemuñas, contra as seis da tarde o incendio parecía controlado, aínda que os medios mobilizados permanecían sobre o terreo. O incendio quedou estabilizado antes das 19:00 horas.
A partir do mediodía deste mércores sucedéronse os incendios por toda a provincia. Continuaba activo o lume declarado onte en Ribadavia. Tamén houbo alertas en Vilamarín, A Bola, Verea, Xinzo de Limia e Leiro.