Cada ano, ás portas das numerosas manifestacións do feminismo galego que se desenvolven o 8 de marzo -Día Internacional da Muller- celébrase unha manifestación previa e única nun punto concreto de Galicia, e este ano, as Galegas 8M escolleron Verín. Durante os últimos meses a veciñanza mobilizouse para que non se pechara o paridoiro nin as urxencias pediátricas do Hospital de Verín, e a loita das veciñas e veciños da comarca -que obtivo os seus froitos- foi replicada en toda Galicia en prol da defensa da sanidade pública e dos dereitos das mulleres, o que fixo que a plataforma unitaria Galegas 8M, que convocan a manifestación, escolleran Verín como a sede da deste ano.
A marcha comezará ás 12:00 horas dende o IES Xesús Taboada Chivite -na Avenida de Portugal- e rematará na Praza Maior, onde se lerá un manifesto, elaborado por todas as mulleres integrantes de Galegas 8M. Cristina Huete -xornalista-, Susana Bueriberi -verinesa adicada ós coidados e que participou activamente na defensa do paritorio-, Daniela Ferrández -activista trans e feminista- e Rosana Méndez -enfermeira do Hospital de Verín- serán as encargadas de darlle voz ó manifesto. Ademais, haberá actuacións musicais, un xantar colectivo e unha foliada.
"Sen coidados non hai vida. Mudando o sistema, derrubando o patriarcado" é o lema da manifestación, que fai fincapé no traballo "invisible" dos coidados, realizados de forma maioritaria por mulleres. Así, a manifestación en Verín servirá como previa ás mobilizacións que se están a convocar en todas as cidades e vilas galegas para o vindeiro 8 de marzo.
