As reclamacións da veciñanza do barrio da Cruz Vermella en Verín volven poñer o foco na situación de abandono que, segundo denuncian, sofre esta zona da localidade. As concelleiras do Partido Popular en Verín Lara Da Silva, Sonia Arias e Beatriz Blanco, xunto co deputado autonómico Víctor Baladrón, visitaron o barrio para escoitar as reivindicacións.
Os veciños sinalan que as rúas atópanse en mal estado e o firme está levantado, deficiencias que dificultan o acceso ás súas vivendas e empresas. Lamentan, ademais, ter escoitado "falsas promesas" durante este último ano por parte do Concello de Verín.
Solucións a través do Plan CooperOU
Ante esta situación, o PP reclama ao grupo de goberno que "escoite a esta veciñanza, atenda as súas necesidades reais e deixe de enganalos". Os representantes populares recordan que o Concello ten a oportunidade de financiar estas obras de mellora a través do Plan CooperOU da Deputación de Ourense.
Segundo recordan, o Plan CooperOU xa permitiu o asfaltado de varias rúas e a adecuación de accesos no municipio, e Verín acadará máis de 2,1 millóns de euros a través deste programa provincial durante a lexislatura. "O bipartito debe deixar as escusas a un lado e pórse a traballar para mellorar a calidade dos nosos veciños e veciñas", engadiron.
Abandono das infraestruturas urbanas
Os populares tamén indicaron que a situación de abandono non só afecta á Cruz Vermella, senón tamén a rúas céntricas, como a rúa Galicia, e a vías principais en núcleos rurais como Queizás, Vilamaior, Pazos e Tintores, lamentando o "desinterese habitual" por parte do goberno local. "A nosa veciñanza merece vivir nunha localidade segura e coidada", conclúen os populares tras a visita.
