martes 28/09/21
O sindicato AXG - CUT solicita a realización de probas PCR a todos os funcionarios das instalacións verinenses

Suspenden todas as dilixencias sinaladas nos xulgados de Verín pola confirmación de tres positivos

Todas as dilixencias sinaladas para este xoves foron esta mañá suspendidas logo de se confirmar un gromo nos xulgados da vila de Verín. O sindicato AXG - CUT solicita a inmediata realización de probas PCR a todo o seu persoal

Edificio dos xulgados de Verín, na rúa Irmáns Moreno. | FOTO: Xosé Lois Colmenero.
Edificio dos xulgados de Verín, na rúa Irmáns Moreno. | FOTO: Xosé Lois Colmenero.

Dous funcionarios e unha procuradora son, arestora, os positivos detectados nos xulgados de Verín e que motivaron que esta mesma mañá se suspendesen todas as dilixencias sinaladas para este xoves. Ademais, segundo aseguran fontes da formación sindical AXG - CUT, "están tamén un traballador máis que presenta síntomas e un quinto que está en illamento por ser contacto estreito con dous positivos", din no comunicado remitido solicitando a "inmediata" intervención das autoridades sanitarias para, entre outras medidas, "ampliar a proba PCR a todos os traballadores dos xulgados de Verín e pór en corentena a todos eles ata que non se coñezan os resultados das probas". 

Segundo critican dende Alternativas na Xustiza, "a Xunta de Galicia, nun acto de absoluto desprezo e ignominia para cas traballadoras, maxistrado e letrado, ignorou a este persoal, deixando que a Covid - 19 se apoderase dos xulgados de Verín", máxime cando "o pasado día 7 de xaneiro, dende AXG - CUT se lle solicitou á Dirección Xeral de Xustiza, por carta, a realización das probas PCR de detección ás traballadoras dos xulgados verinenses, aproveitando que o Sergas estaba facendo un cribado masivo neses días a todos os cidadáns dada a alta incidencia de casos na vila e comarca", apuntan. 

Solicitan tamén que, ademais de levar a cabo un completa desinfección dos dous xulgados, "se dispoña persoal suficiente para cubrir as baixas dos positivos e evitar que os cidadáns de Verín non se vexan afectados pola falta de prevención da Xunta de Galicia", rematan. 

Suspenden todas as dilixencias sinaladas nos xulgados de Verín pola confirmación de...
comentarios
Entrando na páxina solicitada Saltar publicidade