A Xunta de Galicia, a través do Servizo Galego de Saúde, vén de facer pública no Portal de Contratos Públicos a adxudicación por un importe total de 519.623 euros destinado á compra de oito ecógrafos.
Estes novos dispositivos médicos irán dirixidos a varios hospitais comarcais da rede sanitaria pública galega, entre os que se atopa o Hospital Público de Verín. O obxectivo do Executivo autonómico é optimizar a calidade asistencial dos servizos de Uroloxía, Dermatoloxía e Cirurxía Xeral e Dixestiva.
No que respecta á comarca de Monterrei, a empresa Celta ingenieros foi a adxudicataria do lote correspondente ao subministro de dous ecógrafos específicos para os servizos de cirurxía xeral e dixestiva.
Estes aparellos terán como destino as instalacións médicas de Verín e de Monforte de Lemos, tras un investimento autonómico que alcanza os 145.151 euros. O mesmo contrato inclúe outras adxudicacións para equipamento nos hospitais da Mariña, Barbanza e O Salnés, quedando aínda pendentes de resolución outros lotes con novos dispositivos para os centros do Barco de Valdeorras e de Cee.
A incorporación destes sistemas aos centros hospitalarios supón un salto cualitativo na capacidade diagnóstica. A ecografía é un procedemento de diagnose por imaxe que permite visualizar con claridade a forma e tamaño de órganos e estruturas brandas do interior do corpo, como tendóns, ligamentos, músculos ou a glándula tiroide. Ademais, estes equipos tecnolóxicos ofrecen a posibilidade de estudar o fluxo sanguíneo para detectar coágulos ou arteriosclerose.
Actualmente pódense combinar con outras técnicas, como a punción con agullas para realizar unha biopsia ou cos endoscopios, dando lugar a imaxes de fusión que melloran a resposta médica aos pacientes da área sanitaria.
