O Entroido está cada vez máis preto e en Verín xa se preparan para el. O Concello aprobou por unanimidade na Xunta de Goberno celebrada hoxe, o proxecto de organización, orzamento e as bases do Obradoiro do Cigarrón 2022-23, que ten aberto o prazo de inscrición ata o vindeiro 31 de outubro.
A actividade, que rematará antes do Xoves de Compadres, está organizada polo Concello e dende 1997 busca manter dentro dun canon de respecto polas formas tradicionais ó cigarrón, a máscara co maior significado do Entroido de Verín. Os participantes deste obradoiro farán todos os seus elementos constitutivos, salvo os compoñentes de produción industrial e o pintado da careta e da mitra.
Os participantes serán persoas maiores de idade que teñan as tardes libres, polo que poderán facer a máscara completa ou partes da mesma (traxe ou careta) e terán que levar todos os materiais e instrumentos necesarios. Por todo isto, son precisos coñecementos básicos de confección con máquina e levar unha, o que será obrigatorio, así como dispoñer de fundamentos previos sobre labor de punto con agulla de calcetar e sobre tecido con agulla de gancho.
Hai 24 prazas dispoñibles, sendo 12 o número máximo de persoas por actividade. As solicitudes tramitaranse na Casa do Concello e terán en conta a orde de inscrición ata completar o aforo. Admitiranse solicitudes dunha soa persoa e tamén aquelas presentadas por dúas que acrediten un parentesco de ata 4º grao.
O prezo da inscrición é de 95 euros para participar en todas as actividades e de 75 euros para os que só queiran aprender a facer o traxe ou a careta.
