Son dez os colectivos que traballaron na elaboración das tradicionais coplas dos Maios. Ao igual co ano pasado, Verín celebra esta senlleira festa mantendo a elaboración dos versos pero adaptados e optimizados para a súa lectura e difusión a través de internet e dispositivos móbiles.
A concelleira de Cultura, Emilia Somoza, quixo destacar o «extraordinario esforzo e a implicación» que continúan a demostrar todos os colectivos participantes, «posibilitando, grazas seu gran traballo, que entre todos e todas manteñamos viva a esencia desta tradicional festa no actual contexto de limitacións provocado pola pandemia da Covid-19».
A concelleira de Festexos tamén agradeceu o «altruísmo e compromiso social das asociacións que, ao igual q os colexios e institutos que elaboran as coplas, non recibirán este ano ningún tipo de contraprestación por participar», permitindo así que o Concello poida doar íntegra a cantidade orzamentada para os Maios ao programa de atención ás necesidades básicas de persoas da comarca de Verín do C.D.R. Portas Abertas.
Os colectivos que están a elaborar coplas son os seguintes:
- IES Xesús Taboada Chivite
- Colexio Plurilingüe María Inmaculada
- Colexio Apostólico Mercedario
- CEIP Princesa de España
- CEIP Amaro Refojo
- CRA Monterrei
- Asociación de Mulleres Rurais Flor da Xesta
- Conservatorio de Música de Verín
- O Maio dos Patos e
- a Asociación Verinense de Amigos da Música.
A Celebración dos Maios en tempos de Covid-19
Ao non ser posible a venda das coplas e a recadación de fondos solidarios para as asociacións participantes, así como a elaboración dos Maios Florais, debido ás restricións derivadas da actual situación sanitaria provocada pola pandemia, o Concello de Verín mantén o formato creado a pasada edición, destinando a cantidade orzamentada para devanditos festexos a fins sociais.
