NOTICIAS VERÍN | A Feira de Nadal regresa poñendo en valor a música de grupos locais

Os concelleiros Emilia Somoza e Manuel Lorenzo presentaron esta mañá a programación completa da Feira do Nadal. — Os concelleiros Emilia Somoza e Manuel Lorenzo presentaron esta mañá a programación completa da Feira de Nadal.

13:44 do 26 de novembro de 2021

Queda algo máis dunha semana para que comece a Feira de Nadal en Verín. Dará comezo o vindeiro día 4 cun total de 20 postos temáticos de artesanía e alimentación e coa gran novidade da animación musical da man de grupos locais, como o Conservatorio de Música de Verín, a Coral Polifónica ou o cuarteto Nova Era.

"Para esta edición preparamos unha selección musical moi especial, e fixémolo contando co talento dos nosos propios veciños e veciñas. Para iso instalarase un pequeno escenario no centro da praza García Barbón que poderá ser utilizado por todos eles", explicou Emilia Somoza, concelleira de Cultura, quen presentou o programa oficial esta mañá xunto ao concelleiro de Feiras, Manuel Lorenzo.

"Instalaranse na feira un total de vinte postos temáticos que contarán cunha completa e variada oferta de produtos de artesanía e alimentación, sen esquecernos tampouco do xénero máis típico de Nadal como son os agasallos artesáns, a decoración variada ou as típicas figuras para a árbore", anunciaba o concelleiro.

Haberá, por suposto, un espazo adicado aos máis pequenos da casa que recibirán a visita das dúas figuras máis tradicionais do Nadal, como son o Apalpador e Papá Noel. Tamén, desde o luns 6 ao mércores 8 decembro, haberá un servizo de ludoteca infantil no que os nenos e nenas poderán gozar de divertidas actividades lúdicas mentres os seus familiares realizan as pertinentes compras.