A Revolta Irmandiña: Carreira de obstáculos histórica en Monterrei

A organización conta con medio cento de voluntarios que xa traballan na montaxe das diferentes probas.

19 de junio de 2025, 22:57

A comarca de Monterrei prepárase para vivir este domingo, 22 de xuño, unha xornada histórica coa celebración da primeira edición da carreira de obstáculos A Revolta Irmandiña, que nace con gran éxito de convocatoria: máis de 300 persoas inscritas participarán neste gran evento deportivo e cultural.

Organizada polo colectivo KTORCE e con apoio institucional da Xunta de Galicia, a Deputación de Ourense e os Concellos de Verín e Monterrei, esta proba está inspirada na Revolta Irmandiña do século XV. Os participantes poderán escoller entre dous percorridos (5 e 8 km) cheos de obstáculos e probas físicas que discorren por espazos tan emblemáticos como o castelo de Monterrei, o río Támega ou os viñedos da comarca.

Segundo destacou a organización, a carreira busca “ser moito máis ca unha proba deportiva: unha experiencia completa que mestura historia, natureza e tradición”. Con ese obxectivo, o evento estará acompañado dunha ampla programación paralela pensada para todos os públicos.

“Irmandades miúdas”: A aventura para os máis pequenos

A programación infantil “Irmandades Miúdas” converterá tamåén aos máis pequenos en protagonistas da xornada. Cunha excelente acollida previa e decenas de nenos e nenas inscritos, esta actividade ofrece na Preguiza xogos, probas adaptadas e contidos lúdicos inspirados no espírito irmandiño, co obxectivo de educar e divertir ao mesmo tempo.

Sabores da terra co “Pincho Irmandiño”

Durante os días 19, 20 e 21, a gastronomía tamén terá un papel destacado grazas ao Pincho Irmandiño, unha ruta na que participan 10 establecementos hostaleiros da vila: Tapería Rúa Maior, San Roque, Bar Cafetería O Tixo, Brétema, Oh Caruso, Gandainas, Enredo, O Ferro, Almae e Luan’s. Os visitantes poderán saborear creacións inspiradas na historia da comarca durante toda a fin de semana.

Zona de mercado, música en vivo e xantar popular e moitas máis sorpresas

No entorno da Preguiza instalarase unha zona de mercadillo con oito postos que ofrecerán desde artesanía local ata produtos ecolóxicos e solidarios (ganchillo, decoración, cosmética natural, agasallos personalizados, etc.).

A xornada estará amenizada pola música en directo de Candaira así como de música ambiente durante toda a xornada, contribuíndo a crear un ambiente festivo e participativo.

Ao remate da proba, participantes e público poderán compartir un xantar popular, que servirá de colofón perfecto a unha mañá de deporte, historia e convivencia, e onde se recuperará forzas celebrando en comunidade o espírito da Revolta.