Unha muller de 77 anos, que paseaba onte pola rúa Luis Espada de Verín, resultou ferida na cabeza despois de ser golpeada por un vaso de cristal que caeu desde un dos pisos dun dos edificios á altura da esquina coa rúa da Mercede.
Como consecuencia do impacto, a muller, que é a nai da alcaldesa de Riós, Eva Barrio, sufriu unha forte contusión e un corte na cabeza. Foi atendida polos servizos sanitarios que se desprazaron ao lugar tras a alerta, e despois foi trasladada ao Hospital de Verín, onde se lle realizaron diversas probas co fin de descartar lesións máis graves.
Segundo testemuñas, o vaso caeu desde algún dos balcóns dos edificios situados na beirarrúa da parte esquerda da N-525 en dirección Madrid, golpeou á muller e rompeu despois de caer ao chan.
O suceso aconteceu ao redor das 20:30 horas e acudiron unha patrulla da Policía Local, unha unidade da Garda Civil e o 061. A muller está fóra de perigo, segundo confirmou a propia alcaldesa de Riós e filla da afectada.
