A pesares de que este ano a ponte festiva da Constitución non foi longa, as rúas de Verín foron un fervedoiro de persoas. Proba delo é o éxito da Feira de Nadal que se celebrou na vila durante eses días e na que se podía ver un continuo ir e vir de xentes. O Concello de Verín califícaa como "excelente", logo dos resultados das enquisas respondidas polos expositores que participaron.
Os datos reflicten que seguimos unha tónica de mellora continua, ofrecendo aos expositores e visitantes unha experiencia de calidade
Pechada a Feira de Nadal tocaba facer balance, e o Concello de Verín falou cos comerciantes para coñecer a súa valoración e satisfacción co evento. A localización, a limpeza e a organización xeral acadaron valoracións sobresaíntes, pero destaca o incremento nas vendas; expositores e comerciantes puntuaron coa mellor valoración dos últimos anos a satisfacción coas vendas realizadas, que amosan un aumento progresivo con respecto a anteriores edicións.
Estos datos confirman o éxito da Feira de Nadal de Verín, que se consolida como evento imprescindible na vila, motor da economía local e polo de atracción de visitantes. O concelleiro de Feiras, Manuel Lourenzo, destacaba os resultados: "Os datos reflicten que seguimos unha tónica de mellora continua, ofrecendo aos expositores e visitantes unha experiencia de calidade. É especialmente satisfactorio ver un aumento tan significativo nas vendas, algo que é clave para o éxito de calquera feira".
Satisfacción e intención de continuidade
Un dato especialmente relevante é que 30 dos 31 expositores confirmaron o seu interese en participar na Feira de Nadal 2025, destacando a fidelización lograda polo evento. Ademais, o 80% amosou interese por participar na Feira do Lázaro 2025, marcando un récord de intención de participación neste evento en comparación con anos anteriores.
Como en cada edición, outorgouse un premio ao mellor stand. Este ano recaeu en "La luna de los sueños", de Yolanda Hernández Marco e Beatriz Cándido Carrasco.
