O vindeiro martes 2 de decembro, ás 20:00 horas, o Auditorio Municipal de Verín acollerá unha nova edición da Gala da Igualdade, un evento que combina cultura, compromiso social e talento local para reivindicar os valores de xustiza, igualdade, inclusión e non discriminación.
A iniciativa, organizada polo Conservatorio Profesional de Música de Verín (CMUS), a súa ANPA e o Concello de Verín, estará dedicada este ano a Santa Icía, patroa da música e das persoas músicas.
O programa desta edición destaca pola súa diversidade e polo protagonismo da creación local. O alumnado do CMUS será o encargado de abrir a gala coa actuación “O meu primeiro concerto”, unha mostra do talento emerxente das novas xeracións de músicos e músicas da vila.
Un dos momentos máis significativos da velada será a inauguración da nova aula “Homenaxe a quen loita pola igualdade”, un espazo simbólico que recoñece o labor constante de persoas e colectivos comprometidos coa defensa dos dereitos e da igualdade real.
O público tamén poderá gozar das actuacións de KUARTETAS e do Grupo da Banda de Gaitas Nova Era, que completarán a parte musical dunha cita xa consolidada no calendario cultural de Verín.
Como é tradición, a gala pechará cun momento de convivencia entre asistentes e participantes: unha chocolatada final pensada para compartir e celebrar en comunidade os valores que inspiran este encontro anual.
A entrada será gratuíta ata completar aforo.
Dende o Concello de Verín anímase á veciñanza a participar nesta celebración que, a través da arte e da música, reivindica unha sociedade máis igualitaria e inclusiva.
