
O Concello de Verín acabou hoxe as obras de construcción da nova ponte de Queizás. Nesta primeira fase rematouse a estrutura completa do viaduto.
Na segunda etapa deste proxecto procederase a unir a pasarela co polígono industrial de Pazos, asignándolle así un novo acceso á vez que o conectan coa estrada N-532, a que une Verín coa fronteira portuguesa.
A finalidade deste proxecto é, principalmente, a de liberar ó centro do tráfico pesado, fundamentalmente dos camións que se dirixen á zona industrial de Pazos. Isto permitirá tamén que se desconxestione a circulación da N-525, algo que será moi positivo para o núcleo de Verín e arredores.
Dita actuación conleva un investimento total de 1 millón de euros, para o que o Instituto para a Diversificación e o Aforro Enerxético (IDAE) aporta 800.000 euros e os 200.000 euros restantes pertencen a fondos propios municipais.
A segunda fase
Co remate destas obras o Concello de Verín dá luz verde para iniciar a segunda fase, que terá unha inversión de 600.000 euros, para levar a cabo a unión xa citada. Gerardo Seoane, rexedor da vila, alegou que "coa finalización desta segunda fase completarase o novo viario perimetral que servirá de circunvalación complementaria á que se desdobra das autovías A-52 e A-75, de maneira que os camións non teñan que abordar o casco urbano e se reduzan así as emisións contaminantes".