sábado 28/05/22
Na Casa Consistorial tamén se instalarán placas solares.
Na Casa Consistorial tamén se instalarán placas solares.

Como xa adiantara Diario do Támega días atrás, o Concello de Verín vén de anunciar a instalación de paneis fotovoltaicos en oito dos seus principais edificios municipais. En total, o ente municipal investirá 118.787,29 euros nas instalacións, esperando percibir dos fondos europeos Next Generation practicamente o 50 por cento do investimento (53.720 euros).

Segundo confirmou o alcalde Verín, Gerardo Seoane, a Casa Consistorial, o Pavillón Municipal de Deportes, os CEIP Princesa de España e Amaro Refojo, a Biblioteca, o centro de día Solleira, o Pavillón da Granxa e o Auditorio Municipal, serán os edificios públicos elixidos para a instalación dos sistemas de placas solares fotovoltaicas "que reducirán de maneira notable o consumo eléctrico, así coma as emisións de CO2, nestas instalacións".

 

Primeiras concesións recibidas dos fondos Next Generation

O  Concello de Verín recibiu esta semana as primeiras seis comunicacións de concesión de axudas financiadas cos fondos do Plan de Recuperación, Transformación e Resiliencia promovido polo Goberno de España, por un valor de 42.720 euros.

Así pois, o Concello de Verín comezará coa execución das obras de instalación dos paneis fotovoltaicos na Casa Consistorial, Pavillón Municipal de Deportes, CEIPs Princesa de España e Amaro Refojo, Biblioteca e o centro de día Solleira; quedando á espera de recibir, nos próximos días, as dúas resolucións das concesións restantes para executar os traballos no Pavillón da Granxa e no Auditorio Municipal. 

Oito edificios municipais de Verín terán paneis fotovoltaicos
comentarios