Xoves. 07.07.2022
A semana rematará cunha festa de sombreiros artesanais e un obradoiro de graffitis

O campamento urbano do Concello de Verín programa unha acampada nocturna para os cativos

As actividades do campamento urbano que todos os anos pon en marcha o Concello de Verín están a piques de rematar. Os seus organizadores apuran o calendario para darlle unha máis que salientable despedida
180727 NP CONCELLO DE VERIN - DESFILE INFANTIL BATUCADA 2018 (1)
Os cativos do campamento de verán tamén teñen unha participación moi activa na Batucada de Verín.

A Ludoteca de Verán e o campamento urbano do Concello de Verín programan unha serie de xornadas ateigadas de actividades para os máis novos como broche final a un verán que pretenden despedir por todo o alto dentro dun par de semanas. Acampadas nocturnas, xornadas de piragüismo, xogos tradicionais, cinema ou percorridos en bicicleta á beira do Támega, son algunhas das propostas que os responsables da iniciativa teñen programadas para os vindeiros días. 

Así, mañán 27 de agosto, a acampada nocturna estará precedida dunha cea no parque da Alameda, ágape que rematará con xogos en grupos. Amencerán o 28 de agosto a carón do Támega, para unha posterior xornada de piragüismo nas súas augas. Un día despois, o 29 de agosto, será a quenda dos xogos tradicionais. 

A semana rematará con dúas actividades ben distintas, en función da idade dos participantes no campamento. Os máis cativos protagonizarán a festa do sombreiro, para a que será imprescindible que leven un propio e feito por eles. Os que non o sexan tanto, acudirán a un obradoiro de graffitis dentro da programación preparada polo festival Extruga Street.  

CONCILIACIÓN DE 210 CATIVOS

Un total de 210 de menores ocuparon as súas vacacións de verán deste ano asistindo a estas actividades nas que o ocio e a diversión van da man. Diariamente a programación estivo pensada para fomentar a vida saudable, o deporte, a cultura e a curiosidade entre os máis cativos. Xogar aprendendo e ganando valores grazas a actividades como acampadas, obradoiros, excursións e celebración de festexos como San Fermín, o día de Galicia ou a Batucada.

Estas actividades están organizadas dende a área de Mocidade do Concello de Verín. A Ludoteca de Verán e o Campamento Urbano son dous proxectos destinados a conciliar a vida laboral e familiar dos proxenitores e cubrir o tempo vacacional dos menores con idades comprendidas entre os 3 e 13 e 10 e 14 anos, respectivamente.

O campamento urbano do Concello de Verín programa unha acampada nocturna para os cativos
comentarios