O xeodestino Verín-Viana, integrado polos concellos da Mancomunidade de Municipios da Comarca de Verín—Cualedro, Castrelo do Val, Laza, Monterrei, Oímbra, Verín e Vilardevós— xunto con O Riós, A Gudiña, A Mezquita, Vilariño de Conso e Viana do Bolo, pon en marcha unha ambiciosa campaña de dinamización turística para este ano 2026.
O programa, que se estenderá ao longo de seis meses, deseñou un circuíto de 12 andainas gratuítas co obxectivo de achegar aos residentes e visitantes a enorme riqueza natural, histórica, etnográfica e paisaxística deste territorio do sueste da provincia de Ourense.
Este proxecto desenvólvese grazas ao convenio de colaboración asinado entre Turismo de Galicia e a mancomunidade, impulsando a cooperación intermunicipal como estratexia para consolidar unha oferta turística sostible, coordinada e desestacionalizada durante o verán e o outono. Para inaugurar este calendario de sendeirismo, o concello de Cualedro acollerá a primeira cita o vindeiro sábado 30 de maio, recuperando un dos seus trazados máis emblemáticos: a Ruta dos Castros.
A Ruta dos Castros é un percorrido circular de 16 quilómetros con dificultade moderada (media-baixa), que sitúa a súa saída ás 09:00 horas dende o aparcadoiro do Castro da Saceda. Ao longo do camiño, os participantes poderán descubrir elementos patrimoniais de enorme interese, como a Cidá da Saceda —declarada Ben de Interese Cultural (BIC) no ano 2011—, o Castro de San Millao, os de balde muíños do río Pichos, o forno comunitario e a histórica pontella.
A participación é totalmente de balde, pero require inscrición previa obrigatoria a través da plataforma www.celtiatravel.com debido ao límite de prazas. Para obter información detallada, as persoas interesadas poden contactar coas oficinas de turismo de Verín ou de Monterrei.
