Estamos que non nos aguantamos... ista fin de semana tremerá o val co son dos folións e non queremos perdelos! Mañá, venres 27, arrancará o primeiro dos folións pequenos de Laza. A partir das 23 horas, sairá dende a Cerdeiriña acompañados do Trebón do Mildeu, encargados de animar a veciñanza e visitantes para festexar o inicio do Entroido.
Chocos, bombos e fachóns sairán dende o fondo da Cerdeiriña percorrendo o Outeiro, A Picota, A Rúa do Cruceiro, o Couto, a estrada de Vilar de Barrio, Souteliño e volta a Laza para chegar ata Cimadevila.
O sábado será a quenda de Matamá. Dende as 23 horas os Bombeiros de Vences farán tremer os bombos nas rúas da aldea. Ide a xeito, igual atopades as Madamas deambulando entre as casas. Se non queres perder a foilada, velaí vai a programación dos folións.
Folións de Laza
Sairán todos dende A Cerdeiriña, os venres.
- 27 de xaneiro e 3 de febreiro: a partir das 23h. co Trebón do Mildeu.
- 10 de febreiro: a partir das 23h. co son de A Caniceira de Trives.
- 16 de febreiro: Folión dos nenos a partir das 14:30 horas.
- 17 de febreiro, Gran Folión: ás 00h acompañado do retumbar do grupo de bombos Folión da Veiga.
Folións de Matamá
En Matamá celébranse as noites dos sábados a partir das 23 horas. O primeiro folión terá lugar o 28 de xaneiro, cos Bombeiros de Vences. O sábado 4 de febreiro, o 2º folión estará acompañado co son dos Chimpafigos - Dragóns Vermellos. Por último, o 3º folión será o sábado 11 de febreiro, coa música de Candaira.
