Ista tarde comezou en Verín unha nova andaina deportiva para os e as menores da vila coa inauguración do curso nas Escolas Deportivas de Ximnasia Rítmica. Un proxecto posto en marcha polo Concello de Verín e o Club Deportivo Ximnasia Rítmica de Verín que naceu logo da insistencia de moitos pais e nais da vila en reclamar que os seus fillos e fillas puideran practicar iste deporte na vila, sen ter que se desplazar cara outros lugares da provincia, como viña sucedendo ata o de agora.
E boa razón tiñan en reclamalo: a tempada 2019-2020 inaugurouse con máis de 130 menores inscritos que poderán practicar ximnasia rítmica na vila dende iste mes de outubro e ata o vindeiro mes de xuño, coincidindo co curso escolar. Dada a novidade da actividade, se algún menor quere participar na nova Escola Deportiva, aínda está a tempo de inscribirse a través do teléfono 988.414.776.
As actividades que desenvolverá o Club Deportivo Ximnasia Rítmica de Verín están destinadas a menores de entre 3 e 16 anos, divididos en dous grupos según a idade dos cativos e cativas. Por unha banda, haberá actividades físicas de base, destinadas ós e ás menores de entre 3 e 6 anos, co obxectivo de acostumalos a ista destreza deportiva; pola outra, aqueles que teñan entre 7 e 16 anos practicarán a modalidade de ximnasia rítmica.
As clases desenvolveranse os martes e xoves, en horario de tarde, dividindo ós e ás menores por grupos de idade
Son moitos os beneficios que iste deporte achega a quen o practica. Ademais de mellorar a condición física, incide moi positivamente na flexibilidade e fomenta a estimulación da coordinación e da concentración. A ximnasia rítmica é unha disciplina moi completa que axuda a coñecer o propio corpo e os seus movementos, a correxir malas posturas e a conectar e coordinar o espazo e o tempo. É un deporte riguroso que ensina a importancia do esforzo, da disciplina e da constancia.
