A Xunta Directiva da Unión Deportiva Ourense mantivo esta semana unha reunión cos representantes da Xunta de Galicia encargados do Estadio do Couto para abordar o preocupante estado das instalacións. Durante o encontro, o club expuxo formalmente a súa inquietude pola saúde dos futbolistas debido ao mal estado do terreo de xogo, as deficiencias xerais noutras áreas do estadio e a necesidade de garantir a igualdade de trato entre todos os clubs usuarios.
Como resposta, a institución autonómica comprometeuse á reinstalación de tepes de céspede nunha obra que comezará este vindeiro domingo, ademais de realizar unha resembra durante os meses de verán. A Xunta adquiriu tamén o compromiso de habilitar o campo para que se poida disputar o partido do 8 de febreiro fronte ao Coruxo FC. Con todo, as obras obrigan a que o encontro do 1 de febreiro fronte ao Burgos CF B teña que disputarse fóra do Couto.
O escenario elixido para este partido como locais será o Estadio José Arjiz, grazas á boa relación co Verín CF, que cede a súa casa para atopar un lugar o máis similar posible ao fogar do club ourensán. Desde a UD Ourense agradeceron a iniciativa de mellorar este símbolo da cidade tras considerar que o trato recibido durante os últimos meses fora indigno.
