Fin de semana cargada de festas na bisbarra. En Verín celebraranse os tradicionais Maios ó longo de toda a xornada do luns, 1 de maio. En Laza, terá lugar a Festa do Santo Cristo, celebración que se alongará toda a fin de semana.
Os Maios, en Verín
Como vén sendo habitual desde os anos oitenta, a praza da Alameda de Verín acollerá a tradicional Festa dos Maios. Este ano, a Praza García Barbón acollerá tamen a Feira Solidaria, coa participación de diversas entidades sen ánimo de lucro que ofrecerán todo tipo de produtos e servizos con fins solidarios. Será a partir das 11 horas.
Ademáis da exhibición dos Maios tradicionais e artísticos, a xornada contará cun pasarrúas a cargo da Banda de Gaitas de Verín. Actividade musical que finalizará o seu percorrido na Alameda da vila para dar paso ó concerto que ofrecerá a Banda de Música do Conservatorio Profesional de Verín. Será ás 13 horas.
As coplas do Certame Enrique Gómez Pato estarán á venda todo o día. Os cartos recadados pola venda das tradicionais coplas retranqueiras irán destinados á Asociación Española contra o Cancro, co fin de axudar no financiamento dos seus programas de investigación.
Santo Cristo, en Laza
A festa relixiosa na honra do Santo Cristo representa a benvida á primavera. Laza acollerá a súa celebración durante os días 28, 29 e 30 de abril. Os festexos contan con actividades cargadas de simbolismo e tradición, curiosas personaxes e a interpretación de escenas tradicionais. Os danzantes, a Eva e o seu baile, o Sacrificio de Isaac, a loita dos mouros e cristiáns ou o levantamento do Maio son algúns exemplos das actividades que terán lugar en Laza durante o Santo Cristo.
O venres, 28 de abril, comezará a festa coa xuntanza para Buscar o Maio. O sábado será o día dedicado ó Levantamento do Maio. Ó finalizar, haberá unha cea popular.
O día grande será o domingo. Ó mediodía terá lugar a Saída da Eva coa procesión; chegarán ata A Picota para interpretar o Sacrificio de Isaac e a Loita dos mouros e cristiáns. Tamén, é o día no que bailan os Danzantes, dando paso á celebración da misa solemne. Durante a tarde, o Baile da Eva encherá de música as rúas de Laza.
