O Festival Internacional de Curtametraxes de Verín contará este ano con máis accións paralelas que en anos anteriores para complementar as proxeccións cinematográficas. Un certame que se celebrará do 8 ó 17 de setembro, convertendo a vila do Támega “no epicentro da cinematografía e da cultura na provincia de Ourense”, sinala Carlos Montero, responsable do certame.
O espazo exterior do Auditorio acollerá actividades gastronómicas e musicais. Como na pasada edición, non faltarán as exitosas catas de viños da DO Monterrei e de cervexas artesanais; esta última a cargo de Gustavo Rey, considerado o mellor tirador de cervexa de España e con música en directo. Retómase a iniciativa “Pincho cine” en diversos locais da vila, con petiscos basados en escenas de cine.
A axenda musical do FIC Vía XIV contará con concertos a cargo dos grupos The Funkles, tributo a The Beatles, e Banda de Garda, que percorrerá o mundo do cinema a través das bandas sonoras. Sen esquecer as sesións de diversos DJs nos arredores do Auditorio de Verín.
O pasado ano, o acto inaugural do FIC de Verín na Praza Maior acadou un gran éxito de público que vibrou co cinema ó aire libre musicalizado en directo. Nesta edición, e co obxectivo de levar a esencia do festival ata o corazón da vila, a organización repite a aposta e volve contar co grupo Caspervek , encargado de pór música a pezas como Viaje a la luna ou Alicia en el país de las maravillas.
Inda sen rematar a axenda de actividades paralelas, si se retomará o podcast propio do certame, con entrevisas en directo a diferentes persoeiros e convidados do FIC Vía XIV 2023. Nesta edición, o festival proxectará fóra de concurso a curtametraxe Enferma, thriller dirixido por Manel Salgueiro e protagonizado polo actor local Toni Salgado.
