O Concello da Mezquita, en colaboración coa Asociación de Voluntarios de Protección Civil do municipio e mailo Banco de Alimentos de Ourense, puxo en marcha a campaña 'Por un Nadal feliz para todos', a través da cal se executa unha recollida de alimentos para que as familias máis necesitadas dispoñan de suficientes víveres nunha época tan sinalada como é o Nadal.
O alcalde do municipio, o nacionalista Rafael Pérez, insta á colaboración por parte dos veciños e veciñas con alimentos non perecedoiros, é dicir, aqueles produtos que duran máis tempo, non precisan refrixeración e as súas condicións de almacenamento son de menor requisito.
Tal e como se fixo noutras ocasións, estes produtos deberán ser debidamente entregados nos puntos de recollida habilitados do municipio, como os establecementos comerciais e as oficinas da casa consistorial.
Exemplos destes alimentos poden ser, de entre outros moitos, os seguintes:
- Produtos enlatados
- Aceites
- Café
- Cereais
- Fariñas
- Legumes
- Pastas
- Froitos secos
- Leite
- Cacao en pó
- Galletas