A loita por un servizo de tren digno e accesible para todas e todos segue o seu curso e a plataforma Dereito ao Tren deu un paso máis. Tras reunir milleiros de sinaturas e acadar unha masiva asistencia da veciñanza das bisbarras de Verín-Monterrei, Viana e Valdeorras e da veciña Zamora á manifestación de agosto, agora o colectivo reuniuse co subdelegado do Goberno en Ourense, Eladio Santos.
No encontro, a plataforma veciñal trasladoulle ao subdelegado do Goberno as súas demandas para conseguir que se recuperen as frecuencias de tren na estación da Gudiña, un servizo que consideran clave para o futuro e a cohesión do seu territorio. Eladio Santos comprometeuse a trasladar as demandas ao Ministerio de Transportes e Mobilidade Sustentable, asegurando que se está a traballar en permanente contacto coas alcaldesas e alcaldes da zona para mellorar os servizos.
A plataforma veciñal, que naceu tras a supresión de paradas do AVE na estación da Gudiña, pon de manifesto a importancia da unidade e da perseveranza na defensa dos dereitos da veciñanza do rural. Esta reunión é unha máis das que están a manter con todos os axentes implicados e, como prometen, a loita continurá ata conseguir o seu obxectivo: un transporte que sexa vida e futuro para o rural galego.
