O Ministerio de Transportes e Mobilidade Sostible, dirixido por Óscar Puente, vén de confirmar un novo e duro revés para a comarca. Nunha resposta parlamentaria rexistrada o 23 de febreiro de 2026, o Executivo central négase en rotundo a recuperar as paradas matinais do AVE na estación da Gudiña-Porta de Galicia, suprimidas o pasado 9 de xuño.
A contestación oficial chega tras a pregunta formalizada o 17 de decembro de 2025 polos deputados ourensáns do Partido Popular, Celso Delgado, Ana Vázquez e Rosa Quintana, quen reclamaban solucións inmediatas para un drástico recorte que deixou aos usuarios do noso rural sen alternativas viables para viaxar á capital a primeira hora da mañá.
A xustificación aportada por Renfe para manter este castigo ferroviario baséase en que a nosa terminal representa unicamente o 0,69 % da demanda total de todo o corredor. O Goberno asegura na súa misiva que a incorporación dos trens S106 con máis de 500 prazas por unidade supuxo un incremento do 35 % na oferta diaria de asentos e un medre do 109,3 % respecto á dispoñibilidade previa a maio de 2024, acadando as 68.700 prazas en toda a liña xunto con 11 circulacións semanais.
A operadora defende no seu escrito que a distribución actual garante a mobilidade e contribúe á cohesión territorial, limitándose a sinalar que "se se detecta que a oferta non se axusta ás necesidades dos viaxeiros, analizaranse as posibilidades técnicas para adecuala", pero sempre baixo ríxidos criterios de "eficacia, eficiencia e sustentabilidade".
Dende as filas populares, o deputado Celso Delgado cualificou a insólita resposta gobernamental de "insultante" e dun "desprezo maiúsculo" cara aos milleiros de usuarios de Monterrei, Viana, Valdeorras, Trives, Conso-Frieiras, A Limia e mesmo dos viaxeiros das zonas fronteirizas de Portugal.
A indignación é máxima ante as flagrantes mentiras do ministro Óscar Puente, quen o pasado 14 de decembro de 2025, nunha entrevista no Diario de Valladolid-El Mundo, asegurou publicamente que o seu equipo traballaba en devolver axiña as frecuencias suprimidas mediante conexións con Zamora. Ademais, o propio responsable ministerial volveu prometer en xaneiro de 2026 que aproveitarían a nova conexión electrificada con Lugo para habilitar un servizo Alvia matinal de alta velocidade.
Tras oito meses destas promesas incumpridas, a única opción actual para os veciños da contorna é coller un tren AVLO ás 12:06 horas que chega a Madrid-Chamartín ás 14:08 horas, tendo que regresar forzosamente no derradeiro convoi das 18:06 horas que aterra na vila ourensá ás 20:02 horas. Este esquema foi tachado como un "auténtico disparate de horarios" e algo totalmente inútil e discriminatorio para quen precisa acudir a consultas médicas urxentes, facer xestións administrativas de mañá, conectar con outros corredores ou tomar un voo no aeroporto de Barajas.
