AXENDA | Cualedro acolle a Ruta dos Castros dentro do programa de sendeirismo do Xeodestino Verín-Viana

O concello de Cualedro inaugurará o calendario oficial de sendeirismo do Xeodestino Verín-Viana coa posta en marcha da I Andaina Ruta dos Castros. O circuíto de actividades ao aire libre de balde conta co cofinanciamento do Xacobeo 2027, a Xunta de Galicia (a través de Galicia Calidade) e a Mancomunidade de Municipios da Comarca de Verín. Esta primeira andaina, de carácter circular, desenvolverase o vindeiro sábado, 30 de maio de 2026, fixándose o punto de encontro e saída ás 09:00 horas no aparcadoiro do Castro da Saceda.

O trazado deseñado pola organización consta de 16 quilómetros de distancia cunha dificultade media-baixa e un tempo de percorrido estimado de catro horas. A andaina circular de Cualedro combina o deporte coa posta en valor do patrimonio etnográfico do sueste ourensán, cruzando paraxes de gran beleza paisaxística na serra do Larouco e puntos de interese arqueolóxico único coma o Castro da Saceda —declarado Ben de Interese Cultural dende o ano 2011—, o Castro San Millao, o forno comunal, os muíños do río Pichos e a histórica pontella. Ao finalizar a marcha, todos os sendeiristas poderán desfrutar de dous pinchos tradicionais gratuítos cortesía da organización.

As prazas para poder participar nesta cita son de balde pero teñen un límite de seguridade estrito, polo que resulta obrigatorio formalizar o rexistro con anterioridade na plataforma oficial www.celtiatravel.com. Para resolver calquera consulta ou obter detalles sobre os perfís técnicos e as recomendacións de roupa para a xornada do sábado, os interesados poden contactar a través do número de teléfono 635 482 477 ou por mensaxe na canle de WhatsApp 629 858 134.