Turismo de Galicia, en colaboración coas Asociacións das Rutas dos Viños de Galicia, vén de presentar "Primavera de portas abertas nas Rutas dos Viños de Galicia", a campaña de promoción do enoturismo para o 2023. Un completo programa actividades que busca dar a coñecer os roteiros do viño das distintas denominacións de orixe de Galicia, uníndoas coa riqueza patrimonial, natural e cultural dos seus territorios.
A Ruta do Viño de Monterrei abrirá a súas portas os días 2, 3 e 4 de xuño. Jonatás Gago, presidente do CRDO Monterrei, presentaba en Compostela as actividades programadas, organizadas e pensadas co obxectivo de atraer turismo á comarca pondo en valor o territorio da denominación e os caldos de Monterrei.
Este ano, a diversidade de actividades será gratificante para as persoas que se inscriban. Os "buses do viño" arrancarán dende Vigo, A Coruña, Santiago de Compostela, Pontevedra e Ourense o sábado, 3 de xuño. Non faltarán as tradicionais: a ruta dos lagares rupestres do concello de Oímbra e as visitas á adega - lagar "As Barrocas" e ó conxunto da acrópole de Monterrei. Precisamente alí, no Hospital da Trinidade, abrirase unha exposición de arte para que podan acudir os participantes.
Experiencias únicas
A actividade máis salientable nista edición será a "Cata de estrelas", un evento pensado para a observación astronómica acompañada de viños da Denominación de Orixe Monterrei. Dende a organización advirten que esta actividade pode sufrir alteracións debido á climatoloxía; está programa para o sábado 3 de xuño.
No eido gastronómico, "Viños de Monterrei e xamón ibérico" é un seminario de harmonías no que os participantes descubrirán distintos viños da Denominación de Orixe Monterrei maridados con 5 dos 7 sabores presentes no xamón ibérico. Para aquelas persoas máis creativas, "Artesanía e viño" proporá a realización dunha creación artística de elaboración propia, lembranza do seu paso pola "Primavera de portas abertas na Ruta do Viño Monterrei".
Non pode faltar a cata dos caldos de Monterrei, o "Tunel de anadas das adegas da Ruto do viño Monterrei" exporá viños das distintas adegas da denominación. Cada un deles será exposto xunto a unha ou dúas anadas pretéritas do mesmo, co obxectivo de amosar o potencial envellecemento dos viños da comarca.
Como novidade, este ano porase en marcha unha plataforma de comercialización desde a que se ofertarán de forma telemática as reservas para participar nestas experiencias enoturísticas.