A área de Igualdade da Deputación de Ourense dedica o seu programa "8M, Mes a Mes" ás traballadoras que estiveron en primeira liña durante a vaga de lumes deste verán. A iniciativa, que cada mes visibiliza a un colectivo de mulleres referentes, quere homenaxear en setembro o labor de técnicas, capataces, emisoristas, axentes, brigadistas e demais profesionais implicadas na extinción de incendios.
A homenaxe ponlle rostro ao colectivo coa figura de Noelia Conde Míguez, xefa da brigada forestal Azureira, no Distrito Forestal XII. Noelia, orixinaria do Carballiño, defende que "o liderado non entende de xénero, senón de compromiso, preparación e empatía", un lema que a Deputación emprega na súa honra: "O lume non entende de teitos de cristal".
Noelia Conde asegura que o vivido nesta campaña foi diferente, xa que "este verán, Galicia ardeu como poucas veces na historia". A profesional traslada que "detrás de cada cifra hai rostros, bágoas, decisións urxentes e un esforzo colectivo". Con esta homenaxe a través da figura de Noelia, a Deputación quere agradecer o labor de todos os medios de extinción.
