A Deputación de Ourense acolleu este venres a presentación oficial da XXIX Feira do Pemento de Oímbra, evento declarado de Interese Turístico Galego que se celebrará o vindeiro domingo 2 de agosto. No acto estiveron presentes a alcaldesa do Concello de Oímbra, Ana Villarino, e o presidente do Inorde, Rosendo Luis Fernández, quen destacaron o valor estratéxico e a calidade dos produtos da horta da comarca.
Durante a rolda de prensa, a rexedora municipal, Ana Villarino, subliñou a relevancia deste evento para o desenvolvemento económico e a proxección do municipio. "Coa visibilización e divulgación dos pementos, a agricultura de Oímbra ten que camiñar cara a transformación destes produtos, para que a curto e medio prazo o valor engadido dos nosos esforzos repercuta na nosa economía", sinalou a alcaldesa, quen tamén incidiu na vantaxe competitiva que supón contar coa Indicación Xeográfica Protexida Pemento de Oímbra para posicionarse nos mercados.
Amplo e consolidado programa
A xornada festiva do 2 de agosto contará cun amplo programa de actividades para todos os públicos. A partir das 11.00 horas haberá animación musical, e ás 12.00 horas abrirase a Exposición de Pratos de Cociña, elaborados co pemento como ingrediente principal, xunto coa publicación do receitario coas preparacións participantes. Ás 14.00 horas celebrarase a tradicional Comida Popular, mentres que a tarde estará amenizada pola Charanga Támega entre as 15.00 e as 20.00 horas. O peche musical correrá a cargo de Rosa Cedrón, cun concerto con entrada de balde ás 21.00 horas.
Durante toda a xornada haberá degustación gratuíta de pementos, stands de artesanía, maquinaria agrícola e produtos diversos, así como hinchables gratis para a cativada.
