Xoves. 28.03.2024
Cartel coa programación da Xuntanza Internacional de Gaiteiros en Monterrei.
Cartel coa programación da Xuntanza Internacional de Gaiteiros en Monterrei.

O Castelo de Monterrei será o emprazamento perfecto para que os días 26 e 27 de agosto se leve a cabo a XXXVII Xuntanza Internacional de Gaiteiros. Preto dunha vintena dos máis destacados músicos e agrupacións chegadas de diversos puntos de Galicia, Bélxica, Cuba ou Francia, ofrecerán ao público concertos especais, pero tamén exposicións e conferencias. Ademais, este rendirase homenaxe ao mestre gaiteiro coruñés Miguel Anxo López Paradelo.

Hoxe presentouse este evento, declarado de interese turístico e cultural, que contribúe a reforzar a "identidade propia que representa a gaita", destacou Rosendo Fernández, vicepresidente primeiro da Deputación de Ourense, institución que colabora ne realización desta xuntanza.

Desde 2007, o Castelo de Monterrei acolle esta xuntaza que xa conta con máis de 30 anos de traxectoria. "É unha cita senlleira dentro do calendario de actividades culturais da provincia", sinalou Fernández. O evento declarouse no 2016 como de interese turístico e cultural, o que pon en valor "o propio e representa o noso folclore a través do que chamamos a gaitoterapia".

O venres comezará o programa desta xuntanza cun curso de técnica de Ulieann Pipe, gaita irlandesa, que está a cargo de César Pastor ás 11:00 horas. O concerto da cantante Carmen Penim -ás 19:00 horas- completará a xornada, xunto coa inauguración da exposición fotográfica sobre a gaita desde o século XII ao XX.

O sábado 27 comezará coa conferencia do investigador francés Jean Luc-Matte, que falará sobre a representación dos pastores na iconografía do Nadal ás 12:30 horas. Pola tarde, ás 19:00 horas, está previsto que se inicie o acto central desta xuntanza coa intervención de preto de vinte músicos e agrupacións musicais.

Este ano destacan o cubano Alejandro Suárez, a belga Marieke Van Rasnbeek, o pontevedrés Óscar Ibáñez ou as cantareiras de Santa Baia dos montes, da comarca de Monterrei. A Real Banda de Gaitas da Deputación será a encargada de poñer o peche a esta encontro de gaiteiros. 

O evento poderase seguir en directo a través da web da Deputación de Ourense.

NOTICIAS VERÍN | Gaiteiros do mundo teñen unha cita ineludible no Castelo de Monterrei