Esta fin de semana un grupo de voluntarios e voluntarias participaron na "Ruta da Basuraleza" organizada pola Comunidade de Montes de Chaguazoso, en colaboración co Concello da Mezquita. Máis de 25 persoas acudiron á chamada para recoller lixo nos montes da localidade... e atoparon de todo.
Foi preciso un remolque para trasladar a gran cantidade de restos e desperdicios encontrados polos participantes na ruta: desde bicicletas ata bidóns, rodas, motores de coche, patinetes e, como non, un somier. Iso sen contar as numerosas bolsas que acumularon cos refugallos pequenos.
A iniciativa foi moi ben acollida polos participantes, grandes e pequenos traballaron a reo nunha xornada posta en marcha co obxectivo de limpar os montes de Chaguazoso e, tamén, de concienciar da necesidade de coidar a natureza e de non converter os montes en vertedoiros ilegais.
O grupo de voluntarios de limpeza dos montes de Chaguazoso logo da recollida de lixo. | FOTOS: Cedidas.
