AXENDA | Festas do Corpus en Vilardevós

Como cada ano, Vilardevós prepárase para vestir as súas mellores galas e celebrar unha das festividades máis fermosas e arraigadas do seu calendario: o Corpus Christi 2025. Este domingo, 22 de xuño, as súas rúas volverán transformarse nunha obra de arte efémera grazas ao traballo artesán das súas xentes, que un ano máis deseñarán as xa icónicas alfombras florais para acoller a procesión.

A xornada festiva dará comezo coa enerxía e a alegría que contaxia a charanga NOVA de Trives, que percorrerá as rúas de Vilardevós co seu pasarrúas, anunciando a chegada dun día cargado de tradición. Ás 12:00 horas, a solemnidade tomará o protagonismo coa misa solemne e a posterior Procesión polas rúas engalanadas, un momento de profunda beleza e devoción colectiva.

Pero a festa non rematará coa mañá. A tardiña promete ser de auténtica celebración e diversión. A partir das 19:30 horas, o ambiente festivo continuará cunha festa rachada que fará bailar a todas e todos. Será o DUO MARATON o encargado de poñer a banda sonora a esta xornada de convivencia e alegría popular.