AXENDA | O escritor local Francisco Xavier Pérez Álvarez regresa ás librarías cunha nova obra

A Biblioteca Municipal do Concello de Verín ten programada unha nova e destacada cita coas letras para o vindeiro 5 de marzo. Ás 19:30 horas, o salón de actos da Casa da Cultura converterase no escenario elixido para a presentación oficial do libro Nos regos de novembro, a nova proposta literaria asinada polo autor local Francisco Xavier Pérez Álvarez.

A obra literaria estrutúrase nunha coidada serie de capítulos inconexos e senlleiros que abordan unha temática moi variopinta e diversa. O escritor adapta o seu estilo ás necesidades da prosa en cada intre, amosando a súa particular visión para entender o mundo dende a perspectiva do narrador. Así, os lectores poderán atopar profundas reflexións filosóficas arredor de temas vitais como o sentido da vida, a existencia do alén, a morte ou a propia soidade. Ademais, a pluma do narrador adquire por momentos un ton mordaz e epigramático, debuxando escenas esperpénticas e insólitas, para logo dar paso a unha voz moito máis intimista e lírica, servindo de trasfondo para todo o seu universo narrativo. Todo isto compleméntase cun substrato de corte xornalístico que eleva a simple anécdota á categoría poética, configurando un mapa de ronseis que transita polo proceloso océano da realidade ata deixar a súa imborrable pegada no público.

Nado na localidade de Servoi no ano 1969, Francisco Xavier Pérez Álvarez estudou Filoloxía Clásica e licenciouse en Filoloxía Hispánica pola Universidade de Santiago de Compostela. O seu amplo currículo profesional inclúe a participación directa no Instituto da Lingua Galega para a redacción do cuarto volume do Atlas Lingüístico de Galicia, así como continuas colaboracións en revistas de pensamento crítico tan prestixiosas como A Trabe de Ouro e Cadernos de Lingua. A súa incansable traxectoria está tamén marcada polos seus intensos traballos de campo no eido da dialectoloxía, investigando en zonas da Raia próximas a Vilardevós e na vertente transmontana. O seu gran salto á produción literaria produciuse no ano 2020 coa publicación de Lembranzas dun vagalume de outono, á que seguiu no 2023 a exitosa serie de relatos Onde o mundo se chama Servoi. Agora, o recoñecido autor verinés regresa ás librarías da nosa comarca para seguir cautivando a todos coa súa inmensa creatividade e a súa particular cosmovisión.