AXENDA | Concerto solidario en Verín a favor de entidades sociais da comarca

O próximo 29 de marzo, o Auditorio Municipal de Verín encherase de música e solidariedade coa celebración dun concerto benéfico organizado polo Conservatorio Profesional de Música de Verín e a súa ANPA.

O evento, que comezará ás 20:00 horas, ten como obxectivo recadar fondos e dar visibilidade ao importante labor que realizan organizacións como Femuro, Cáritas, Cruz Vermella, CDR Portas Abertas e a Asociación Española Contra o Cancro. Antes do concerto, a partir das 19:00 horas, os asistentes poderán visitar stands informativos destas entidades colaboradoras.

O programa musical promete ser variado e emocionante, con actuacións da Minibanda CMUS de Verín, a Banda de Música de Verín, o Coro do CMUS de Verín, a Coral de Verín e os acordeóns "Sons do Mestremiro".

As entradas para o concerto teñen un prezo de 5 euros e xa están dispoñibles no Auditorio Municipal e nos puntos de venda habilitados polas entidades solidarias colaboradoras.