AXENDA | Derbi de alto voltaxe en Verín: o Dentalnova Futsal enfróntase a A Gudiña F.S

O fútbol sala non para na comarca. O Pavillón Municipal de Verín acolle este sábado 14 un apaixoante derbi; o encontro que enfronta ao Dentalnova Futsal ante A Gudiña F.S disputarase ás 19:00 horas e ambos conxuntos loitarán por levarse a vitoria para poder manterse nos postos altos da clasificación.

Afonso Delgado, presidente do Dentalnova, espera un encontro moi igualado no que a intensidade vai ser protagonista no xogo: “Vai ser un partido moi intenso no que medimos a un clube amigo, co que temos un pique sano”. Afonso asegura que o papel dos afeccionados vai ser moi importante: “Vai ser moi importante o apoio da nosa afición para que, máis que nunca, o Municipal sexa un fortín”.

O Dentalnova chega ó encontro como o terceiro clasificado da táboa cunha soa derrota. O conxunto local espera poder alongar o bo momento de forma e levarse os tres puntos. A Gudiña non llo vai poñer fácil, a tan só 5 puntos dos locais, é para eles un encontro clave para poder afianzarse nos postos de promoción.