AXENDA | "Onde está o Zeca?", unha reflexión sobre o legado do cantautor portugués

Este domingo, 27 de abril, ás 11:30 horas, o Salón de Actos da Casa da Cultura de Verín será o escenario da proxección do documental "Onde está o Zeca?". Dirixido por Tiago Pereira e protagonizado por Abel Andrade xunto a un grupo de artistas comprometidos coa música e a sociedade, o filme convida a unha profunda reflexión sobre a figura de José Afonso, o icónico cantautor portugués coñecido como Zeca.

A través das voces de creadores contemporáneos, o documental explora como o legado de Zeca Afonso continúa vivo e influente na música actual, na capacidade das cancións para intervir no espazo público e na importancia de escoitar as orixes e as ideas dos autores. A pregunta que lanza o filme vai máis alá da procura física do artista: "Onde está o Zeca?" convértese nunha interrogación sobre a nosa propia posición no mundo que habitamos.

Esta proxección enmárcase dentro do ambicioso proxecto "Cravos e Rosas – Confluências Portugal >< Galiza", que desde o 25 de abril ata o 17 de maio artella unha rede de máis de 70 iniciativas culturais, educativas, artísticas e sociais entre Portugal e Galicia. Verín súmase así a esta importante plataforma de intercambio cultural, compartindo pensamento, memoria e futuro a través desta sentida homenaxe a unha figura fundamental da música lusófona. A entrada á proxección é libre ata completar o aforo. Unha cita imprescindible para amantes da música con conciencia e para aquelas persoas interesadas en estreitar lazos culturais entre Galicia e Portugal.