AXENDA | Bruno Rúa afonda no patrimonio relixioso cunha dobre presentación literaria

O Salón de Actos da Casa da Cultura de Verín acollerá o vindeiro xoves, 16 de abril ás 19:30 horas, a presentación de dous libros centrados nos templos da comarca.

Será o escenario dunha cita cultural destacada coa presentación de dúas obras dedicadas ao patrimonio relixioso da Tamagania. Trátase dun proxecto dividido en dous volumes que abordan, desde perspectivas diferentes, a riqueza histórica e simbólica dos templos da comarca.

O primeiro dos libros, “Igrexas e mosteiros”, ofrece unha descrición detallada destes espazos. A obra recompila información de todas as igrexas da zona e inclúe tamén un amplo capítulo dedicado aos mosteiros, tanto aos que aínda se conservan como a aqueles dos que só queda constancia histórica tras a súa desaparición.

Pola súa banda, o segundo volume, “Capelas, ermidas e santuarios” explora outro tipo de construcións relixiosas. A través de historias, lendas e descricións, o autor mergúllase nestes espazos máis ligados á devoción popular, onde se mesturan tradicións cristiás con crenzas pagás. Moitas destas edificacións, situadas en lugares apartados, conservan o eco de antigos cultos e prácticas ancestrais.

Ambas publicacións pretenden ofrecer unha visión completa do patrimonio relixioso da Tamagania, non só a través dos templos que se conservan na actualidade, senón tamén daqueles dos que só perdura a memoria.