AXENDA | Cualedro celebra a primeira Festa da Cachena cun concerto do grupo A Roda

O Concello de Cualedro organiza a primeira edición da Festa da Cachena, que terá lugar no Toural da Feira. A iniciativa, impulsada polo alcalde Luciano Rivero, conta co respaldo da Axencia Galega da Calidade Alimentaria (AGACAL) e da Deputación de Ourense. Terá lugar o sábado 20 de xuño ás 14:30 horas.

O menú estará centrado na cachena criada nos Montes de Lucenza, acompañada de empanada, postre e unha degustación de viños con Denominación de Orixe Monterrei. O prezo da entrada é de 15 euros por persoa, con posibilidade de adquirila nos bares do municipio de Cualedro e no Bar Ruso de Verín.

A programación musical arrancará coa Charanga Fuego, encargada de animar a hora do vermú antes da comida. Posteriormente, o grupo A Roda ofrecerá un concerto para pechar a xornada.

O director da AGACAL, Martín Alemparte, manifestou o apoio do organismo autonómico á celebración pola súa capacidade para dinamizar a economía local e reivindicar o produto de proximidade. Segundo sinalou o rexedor local, a festa forma parte dunha estratexia máis ampla de aposta polos polígonos agrogandeiros do concello, vinculando o pastoreo en réxime extensivo coa prevención de incendios e o coidado dos montes comunais.