AXENDA | Gondulfes agarda á xente camiñante na III Andaina "A cabra tira ao monte"

Terceira edición da andaina “A cabra tira ao monte” en Gondulfes (Castrelo do Val). Unha xornada pensada para gozar do paisaxe e da boa compañía, coa promesa de deixar pegada nos nosos corazóns, e non só nos vieiros. Con 11 quilómetros de percorrido circular e unha dificultade media-alta, esta ruta promete desniveis de 500 metros que farán sentir a vitalidade en cada paso.

Será este domingo, 22 de xuño. A saída está programada para as 09:00 horas desde a propia aldea de Gondulfes, e o traxecto levará por sendas estreitas e regueiros campo a través, un convite a explorar recunchos que namoran. Para que a aventura sexa completa, a organización recomenda levar roupa e calzado cómodo de trekking impermeable, bastóns, bañador e toalla. Haberá dous puntos de avituallamento para repoñer enerxías e, ao remate da andaina, un picoteo na área fluvial de Gondulfes. Quen precise opción sen glute, deberá notificalo á organización.

As inscricións xa están abertas en Multisport Verín e teñen un custo de 6 euros, ou 10 euros para quen quera sumarse ao picoteo. O prazo para inscribirse remata este mércores, 19 de xuño. Ademais da inmersión na paisaxe, a xornada virá acompañada de sorteos de produtos e bonos grazas á colaboración de empresas e entidades locais.