AXENDA | A exposición "Chicas nuevas 24 horas" chega á Mezquita

A impactante exposición "Chicas nuevas 24 horas", obra da recoñecida cineasta Mabel Lozano que denuncia a trata de mulleres con fins de explotación sexual, chega á Mezquita. A mostra, que estará aberta ao público ata o vindeiro 31 de marzo no edificio multiusos, ofrece unha crúa e realista visión da escravitude sexual que afecta a miles de mulleres e nenas en todo o mundo.

A través dunha colección de artigos, fotografías, anuncios de prensa e "normas" que as vítimas deben cumprir nos clubs de prostitución, a exposición -que non deixa indiferente a ninguén- busca sensibilizar e crear conciencia social sobre un negocio que xera máis de 32 mil millóns de dólares ao ano.

Un documental que rompe o silencio das vítimas

A exposición compleméntase coa proxección do documental "Chicas nuevas 24 horas", dirixido pola propia Mabel Lozano en 2015. Unha investigación que recolle os testemuños de mulleres e nenas vítimas da trata en España, Arxentina, Colombia, Paraguay e Perú. Relatos desgarradores que revelan como son enganadas coa promesa dunha vida mellor e convertidas en escravas sexuais.

A proxección do documental terá lugar o martes 25 de marzo ás 16:00h. no edificio multiusos da Mezquita. Unha oportunidade única para escoitar as voces das vítimas e comprender a magnitude dun problema que nos afecta a todos.