Case dous meses despois da aprobación unánime en pleno da licitación do Servizo de Axuda no Fogar (SAF), unha prestación vital para moitas veciñas e veciños de Viana do Bolo, o goberno municipal liderado por Andrés Montesinos (PP) non move ficha. Esta paralización, que mantén en vilo a traballadoras e usuarios do SAF, desata unha onda de indignación e pon en cuestión a vontade real do executivo local para solucionar os problemas que arrastra este servizo dende o ano pasado.
O Bloque Nacionalista Galego, impulsor da proposta aprobada o 20 de marzo, non dubida en sinalar directamente a Andrés Montesinos como o principal responsable desta inacción. A formación nacionalista lembra que, ademais do mandato plenario, un informe da secretaría intervención a principios de abril revelou a existencia de máis de 225.000 euros dispoñibles, fondos adicionais que poderían destinarse a mellorar as condicións económicas do SAF. Ante esta evidencia, o argumento esgrimido polo alcalde popular de Viana do Bolo sobre a falta de orzamento queda completamente desmantelado. "Se non se saca a licitación é por falla de vontade política do señor Montesinos e o PP", denuncia contundentemente o BNG.
Traballadoras en loita
A desesperación e a indignación das traballadoras do SAF, que levan meses denunciando a precariedade das súas condicións, traduciuse en concentracións de protesta que contan co apoio explícito do BNG. Resulta especialmente "cínico e demagóxico", segundo o BNG, a presenza de representantes do goberno de Montesinos nestas mesmas mobilizacións, intentando ofrecer unha imaxe de apoio cando son eles os directos culpables do bloqueo da situación.
Dende o BNG, a esixencia é clara e rotunda: "Instamos unha vez máis ao señor Montesinos e ao goberno do PP a que comecen a dar os pasos necesarios para sacar a licitación deste servizo esencial". Non só está en xogo o benestar das persoas usuarias, senón tamén a dignidade laboral dunhas traballadoras que merecen condicións económicas e seguridade laboral adecuadas. "Déixese de manipulacións, señor Montesinos, e póñase a traballar para solucionar este grave problema", urxe o BNG, reiterando o seu compromiso de seguir loitando polos intereses da veciñanza de Viana a pesar dos obstáculos que impón o goberno municipal.
