Luns. 15.08.2022
Programación de verán en Viana.
Programación de verán en Viana.

O Concello de Viana do Bolo contará este verán cunha ampla programación de actividades para desfrutar na tempada estival baixo o lema "Empápate do verán de Viana!". O calendario xa comezou o pasado 4 de xullo co inicio do segundo Campus Atlético de Madrid no municipio e rematará o 3 de setembro co prato forte, o concerto de Carlos Núñez.

O músico galego chegará a Viana grazas á xira Lugares Máxicos. A cita será na beira do río Bibei e o gaitero non estará só, xa que contará coa presenza das figuras máis representativas do Entroido da zona. As entradas están xa á venda no Concello de Viana.

Esta semana tamén arrincaron as actividades da ludoteca de verán para axudar na conciliación familiar. Esta actividade rematará o 29 de xullo. Nesta liña de axudar a compatibilizar o tempo familiar, do 1 ó 19 de agosto organízase un campamento de verán totalmente de balde. O prazo de inscrición para este último estará aberto ata este venres para nenos nados entre 2008 e 2017. Para anotalos só se precisa cumprimentar unha solicitude e a autorización do tratamento de datos persoais, que deberán presentarse no Rexistro do Concello por vía telemática ou presencial. 

Para aumentar un pouco a adrenalina, esta fin de semana instalarase unha tirolina de 70 metros de lonxitude nas piscinas municipais. O horario tanto do sábado como do domingo será de 12:00 a 14:00 horas pola mañá e de 17:00 a 19:00 horas pola tarde. Os días 30 e 31 de xullo recuperarán o ámbito deportivo cun alquiler de kaiaks. Ambas actividades retomaranse o 20 e 21 de agosto. A programación deste mes rematará co Festival Castelo Son que tará lugar os días 23, 24 e 30.

Na programación de verán de Viana xa hai actividades que están en marcha, como o concurso "Viana ponte guapa!". Este certame quere premiar á fachada mellor decorada do municipio. Ó seu remate, elexirase ós gañadores que se levarán bonos para gastar no comercio local por valor de 200, 100 e 50 euros.

 

Neste mes tamén comezou o programa "Cre, Crea, Crece" destinado á promoción da igualdade e prevención da violencia de xénero que se levará por diferentes aldeas do municipio, previa inscrición no 988 329 260.

Agosto dará comezo coa proxección de "Pegadas" o 6 de agosto. O día 13 será o inicio das festas patronais, que rematarán o día 16. Nese primeiro día contarán coas Xornadas do Folclore para coñecer máis as culturas tradicionais doutros países. Do 22 ó 26, levarase a cabo o campus deportivo "Vila de Viana" e a visita de Os Bolechas queda por determinar neste verán moi movido, no que non faltarán as sorpresas.

Cartel do concerto de Carlos Núñez en Viana.
Cartel do concerto de Carlos Núñez en Viana.

 

NOTICIAS VERÍN | Carlos Núñez, protagonista dun verán moi activo en Viana
comentarios