NOTICIAS VERÍN | A alcaldesa de Riós anuncia que investigará a autoría dos danos no Foxo do Lobo da Urdiñeira

O grupo Ecologistas em Ação Galego-Transmontano denunciou nunha publicación en Facebook este martes os danos causados nun dos muros do Foxo do Lobo da Urdiñeira, entre os concellos da Gudiña e Riós, causados pola apertura, parece que recente, dunha pista forestal xunto ao elemento patrimonial.

A alcaldesa de Riós, Eva Barrio, avanzou este mércores ao Diario do Támega que o Concello de Riós solicitará que se abra unha investigación sobre os danos e a súa autoría.

Segundo informa o colectivo ecoloxista, as imaxes foron tomadas este luns, 6 de xuño, e o movemento de terras parece recente. O lugar onde se sitúa o foxo do lobo está entre Pedrosa, na faldra oeste do monte e pertencente ao concello de Riós, e Parada da Serra, na faldra leste, no concello da Gudiña.

Ao parecer, entre as comunidades de ambos núcleos houbo certa disputa pola titularidade do lugar que acolle o foxo. Houbo algunha pintada na sinalización que dá conta desta polémica. Mais nin o colectivo ecoloxista nin a alcaldesa relaciona os danos con este enfrontamento entre aldeas veciñas. 

Na mesma área na que se sitúa o foxo, a compañía alemá Bay Wa proxecta un polígono eólico de 90 MW con 15 aeroxeradores que está en tramitación no Ministerio para la Transición Ecológica.