Xoves. 28.03.2024
Os 20 alcaldes e Manuel Baltar firmaron hoxe o convenio en Ourense.
O convenio asinouse hoxe en Ourense.

O presidente da Deputación de Ourense, Manuel Baltar, e unha vintena de alcaldes da provincia asinaron esta mañá o primeiro convenio de “Administración con acompañamento dixital”. Con esta iniciativa a cidadanía sen habilidades ou acceso ás novas tecnoloxías poderá solicitar desde o seu propio concello as axudas e servizos que ofrece a área de Benestar. “Cero papel, cero quilómetros, cero desprazamento e cero exclusión dixital”, resumiu Baltar.

A sinatura do convenio tivo lugar en Ourense, onde o presidente da Deputación estivo acompañado pola deputada de Reto Demográfico, Igualdade e Políticas Sociais, Luz Doporto, e mailo responsable da área de Benestar, José Juan Cerdeira. Os concellos asinantes foron Os Blancos, A Bola, Calvos de Randín, O Carballiño, Entrimo, Lobeira, Lobios, Padrenda, Pereiro de Aguiar, Petín, Pobra de Trives, Sarreaus, Riós, Trasmiras e Xinzo de Limia, así como outros cinco de modo indirecto -Beariz, Boborás, O Irixo, Piñor e San Amaro- a través da Mancomunidade do Carballiño. Outros 30 concellos da provincia mostraron interese por incorporarse.

Baltar recoñeceu a relevancia deste acordo, xa que é “realmente importante, porque isto é cooperación e vai na andaina de prestar os mellores servizos públicos ás persoas e colectivos en risco de exclusión dixital”. Con este convenio “moitos veciños dos concellos asinantes poderán presentar as solicitudes de axudas sociais sen ter que desprazarse ata a capital, sen papeis, sen necesidade de que saiban ou poidan utilizar a administración electrónica, é dicir, sen discriminar a ninguén dixitalmente”.

O programa comezará a funcionar este venres 1 de xullo, polo que nestes días 34 técnicos municipais dos concellos asinantes serán dados de alta no sistema de acompañamento dixital. Isto permitiralles cumprimentar dixitalmente as solicitudes, imprimilas e axudar ao cidadán para que as presente fisicamente no rexistro electrónico do seu municipio.

Os alcaldes asinantes reuníronse con Baltar na cidade.
Os alcaldes asinantes reuníronse con Baltar na cidade.

NOTICIAS VERÍN | Riós únese ao plan de acompañamento dixital da Deputación