Os veciños de Riós desexan que a meteoroloxía cambie nesta fin de semana, xa que a partir do luns disporán das piscinas municipais. As súas instalacións abrirán ese día para inaugurar a tempada de verán no concello, que rematará o 26 de agosto co seu peche.
Este ano, o recinto conta con melloras na eficiencia enerxética. O Concello de Riós instalou uns paneis solares para a producción de enerxía e así reducir os custos mentres se coida do medio ambiente. "Coa súa colocación a piscina é autosuficiente, porque producirá a electricidade necesaria para o funcionamento da depuradora", explica a alcaldesa, Eva Barrio. Deste xeito, aforrarase na factura da luz municipal.
O Concello está en proceso de adxudicar tamén o bar das piscinas e así garantir todos os servizos para a veciñanza: "Temos un interesado", apunta Barrio. O horario de apertura será de 12:00 a 20:00 horas todos os días da semana. Os prezos varían de 1 euro para os adultos aos 50 céntimos para nenos e pensionistas.
